أزمات المصريين اللى ترعرعوا فى الخليج

WRITTENBY    Aya Wahdan

Published date: 23/03/2016

١. المصطلحات الدارجة

الناس دى اتربت تسمع كلمات زى"شخبارك؟". ولما حد يحب يجاملهم يقول "طال عمرك".  التحية الدارجة بين البنات "ازيك يا مزة؟"، والصبيان "حبيبى ياسطى". لو حد فيهم رجع مصر وقال "حبيبى ياسطى" أكتر رد محترم هـ يبقى "اسطى ازاى هو انت شايفنى شايل فوطة؟!".

 

٢. الزحمة والاختناق المرورى

هنا فى مصر القانون المرورى الوحيد هو البركة. مفيش حاجة اسمها ماشى عكس الاتجاه هنا بـ تتسمى shortcut. مفيش حاجة اسمها إشارات احنا بـ نطلع دراعنا ولو اللى وراك ما فهمش ولبس فيك تبقى دى مشكلته، مش قصتك خالص انت عملت اللى عليك. مفيش حاجة اسمها حارة سير للنقل التقيل، وحارة للسيارات العادية. هنا النقل التقيل ماشى بمبدأ اللى "هـ يتهور هـ يتعور"! وبيتسابقوا عالطرق السريعة عادى، وتحس إنك دخلت فيلم ترانسفورمرز فرع القنطرة غرب عادى جدا!

الناس بتوع الخليج ما شافوش الكلام ده قبل كده. لو هم مولودين هناك فمن يوم ما وعيوا عالدنيا والناس ماشية بقوانين المرور. المخالفة هناك بفاتورة وغرامة بـ آلافات مؤلفة، وما ينفعش تكرمش للأمين خمسين جنيه ويشيلها لك وانت بتجدد الرخصة. لما بـ ييجى يدخل يمين بـ يستخدم دراع كده فى العربية بـ يخلى لمبة تنور يمين أو شمال العربية علشان يعرفك هو داخل فين بالظبط. عمره ما شاف تريلا ماشية فى وسط البلد لأن دول كانوا بيبدأو حركتهم من بعد ميعاد معين فى وسط الليل، ولهم سرعة ما يتخطوهاش.